Me urdhër të Gjykatës së Apelit të Katanias, mëngjesin e sotëm, janë ekzekutuar 5 urdhër arrestime të reja në kuadër të operacionit të koduar “Rosa dei venti 2”.
Hetimet e operacionit janë ekzekutuar nga Prokuroria e Katanias në bashkëpunim me Komandën Provinciale të Guardia di Finanzës së Katanias, në vazhdimësi të operacionit të vitit 2017 i koduar “Rosa dei Venti” i cili çoi në shkatërrimin e një grupi të strukturuar kriminal të akuzuar për trafikimin e një afere droge me vlerë 20 milionë euro , drejtuar nga vëllezërit Habilaj.
Në hetimet e këtij operacioni u përfshi dhe ish-Ministri i Brendshëm i qeverisë shqiptare, Sajmir Tahiri.
Operacioni i sotëm “Rosa dei Venti 2” ka çuar në arrestime të reja për trafikun e 3.5 tonë marijuanë të shtetasve shqiptarë Nezar Seiti, i konsideruar finacieri i grupit të struktuaruar kriminal të drejtuar nga vëllezërit Habilaj në operacionin e parë “Rosa dei venti” e Maridian Sulaj, si dhe të shtetasve italianë Angelo Busacca, Antonino Riela, Vincenzo Spampinato.
Urdhër arrestimet e reja, sipas autoriteteve italiane, janë rezultati përkatës procedural i hetimeve të detajuara të një grupi të strukturuar kriminal i përbërë nga shtetas shqiptarë e italianë e me bazë në Katania, që importonin marijuanë nga Shqipëria e kontrollonin tregjet e shitjes së drogës në Katania, Sirakuza e Raguza .
Hetimet e reja që kanë vënë nën akuzë të re 5 shtetasit e arrestuar kanë çuar në sekuestrimin e 3.5 tonë marijuanë, një sasi të konsiderueshme para cash, e armë lufte tip kallashnikovë.
Në flagrancë janë arrestuar dhe 24 korrierë droge.
Në bashkëpunim me autoritetet e policisë shqiptare e Interpol, këtij grupi kriminal i atribuohen dhe trafikimi i 4 tonë të tjera marijuanë.
Në operacion morën pjesë dhe roja bregdetare italiane e repartit ajror të Guardia di Finanza së Messinës.
