Kur kanë kaluar më shumë se 7 vjet nga zhdukja në rrethana të mistershme i 16-vjeçarit Mariglen Gjonaj, tashmë s’ka më dyshime mbi identifikimin e tij.
Eshtrat që dolën në sipërfaqen e një shkurreje të djegur në Fushë-Kuqe, të Kurbinit, janë konfirmuar se i përkasin adoleshentit, Gjonaj.
Ekspertiza biologjike e kryer mes profilit të ADN-së së nënës dhe eshtrave të gjetura, ka konfirmuar një profil të njëjtë, nënë-bir. Kjo ekspertizë ka sjellë konfirmimin zyrtar dhe identifikimin e plotë të Mariglen Gjonaj, i cili rezulton të jetë vrarë nga persona ende të paidentifikuar.
Tashmë prokuroria ka nisur hetimet për akuzën e “Vjedhje me pasojç vdekjen” kryer në bashkëpunim dhe “Asgjësimin e kufomës”.
Ndërsa ende është herët për të folur mbi identitetin e autorëve të krimit. Shtatë vite më parë, Mariglen Gjonaj, ishte në mbrëmjen e maturës me shokët e tij, në lagunën e Patokut, por në rrethana misterioze Gjonaj, është zhdukur pa u mësuar asgjë rreth fatit të tij.
Ditën e ngjarjes viktima kishte me vete një orë Roleks dhe një varëse floriri, të cilat ia kishte marrë borxh kushëririt të tij.
Por në 3 Prill 2022, Policia lokale është njoftuar nga banorët e zonës, se kishin gjetur disa eshtra njeriu. Policia dhe prokuroria e Laçit, tërhoqën eshtrat dhe filluan hetimet për identifikimit të tyre. Nuk kaloi shumë ditë dhe prokuroria kërkoi profilin e ADN-së, së të riut Mariglen Gjonaj.
Gruaja ka mbërritur nga Italia në Shqipëri dhe ka dorëzuar një profil ADN-je, pranë laboratorit shkencor të Policisë së Shtetit. Ky profil është analizuar me profilin e marë nga eshtrat e gjendura në Fushë-Kuqe, dhe përgjigjia ka qënë në përputhshmëri të njëjtë.
Ekspertët mjeko-ligjorë kanë dalë në përfundimin se një pjesë e eshtrave të gjetura në zonën e Fushë-Kuqes,rezultojnë të jetë të dëmtuara me mjete të forta.
Specialistët nuk janë në gjendje të përcaktojnë, se cilët janë mjetet e përdorura për goditjen e viktimës, por ky fakt ka lindur dyshime se Mariglen Gjonaj, para se të vritej është dhunuar me sende të forta. Zhdukja e adoleshentit 16-vjeçar, Mariglen Gjonaj, është hetuar fillimisht nga prokuroria e Laçit dhe më pas çështja ka kaluar në prokurorinë e Krimeve të Rënda në Tiranë.
Kjo e fundit kreu hetime për akuzën e rrëmbimit të personit, por pas shpërbërjes së Krimeve të Rënda, dosja i kaloi për hetime të mëtejshme sërisht në Kurbin. Hetimet u pezulluan derisa pak kohë më parë në zonën e Fushë-Kuqes, është gjendur një skelet njeriu. Adoleshenti Gjonaj, u zhduk në rrethana të mistershme teksa ishte në një eskursion me shokët e tij, të klasës. Ditën e zhdukjes ai kishte me vete një orë “Rolex” dhe një varëse floriri.
