Parlamenti i Moldavisë miratoi një ligj që ndalon transmetimin e programeve ruse të lajmeve në vend.
Sipas ligjit për “sigurinë e informacionit”, ndalohet “transmetimi në radio dhe televizion i lajmeve, programeve ushtarake, politike dhe analitike nga vendet që nuk kanë ratifikuar Konventën Evropiane për Televizionin Ndërkufitar”, shkruan Euronews.
Gjithashtu, 50 për qind e programeve të huaja të transmetuara në televizion duhet të vijnë nga Bashkimi Evropian, Shtetet e Bashkuara ose nënshkruesit e kësaj konvente evropiane.
Në terma konkretë, kanalet televizive moldave do të mund të transmetojnë vetëm filma, seriale, programe muzikore ose programe zbavitëse ruse.
Autoritetet ruse kanë qenë shumë kritike ndaj Moldavisë, një vend me një shumicë rumune-folëse, por një pakicë të madhe rusisht-folëse, veçanërisht pasi ajo ka mbështetur fuqishëm Kievin që nga fillimi i luftës.
Qeveria ka pranuar refugjatët e luftës, ka aplikuar për anëtarësim në BE dhe i është premtuar një rritje e konsiderueshme e ndihmës ushtarake nga Perëndimi.
