Lezha do të blindohet nga toka dhe deti gjatë ditëve që do të zhvillohet aktiviteti UNUM Festival 2022.
Drejtoria Vendore e Policisë Lezhë, bën me dije se në kuadër të zhvillimit të aktivitetit UNUM Festival 2022, ka hartuar një plan të detajuar masash që konsistojnë në garantimin e rendit e sigurisë, në parandalimin e aksidenteve rrugore, në parandalimin e shpërndarjes dhe përdorimit të lëndëve narkotike, të parandalimit të konflikteve si pasojë e përdorimit të pijeve alkolike si dhe menaxhimit dhe parandalimit të ngjarjeve kriminale.
“Në kuadër të garantimit të rendit e sigurisë, janë marrë masa për të monitoruar me dronë, makinat inteligjente të pajisura me radarë automatikë, me kamera nga policia kriminale, patrullat e përgjithshme dhe shqiponjat, si dhe në bashkëpunim me Policinë Kufitare, do ketë edhe patrullim në det me mjete lundruese të Policisë Kufitare”, ben me dije policia.
Policia e Lezhës, u bën thirrje të gjithë qytetarët pjesëmarrës në aktivitet, se lëvizja nga qyteti Shëngjin në vendin e zhvillimit të aktivitetit, “do të bëhet vetëm me automjete të shërbimit të transportit ‘’Taxi’’ të licensuar si dhe shërbimet e tjera të kontraktuara nga organizatorët për këtë event, me logot përkatëse”.
Njoftimi
Po në vijim të këtyre masave të marra, Drejtori Vendor i Policisë Lezhë Drejtues i Parë Vehbi Bushati, ka zhvilluar një takim me Kryetarin e Shoqatës së Shërbimit Transport ‘’Taxi’’ në Lezhë z.Arjon Gjini, të cilin e ka siguruar për bashkëpunim e mbështetje, me qëllim ushtrimin e aktivitetit të shërbimit transport ‘’Taxi’’ Lezhë, të licensuar, pa pengesa gjatë gjithë eventit.
Gjithashtu, Drejtor Bushati, ka zhvilluar një takim me Kryetarin e Bashkisë Lezhë z.Pjerin Ndreu, po për këtë qëllim, ku ka gjetur mbështetjen e plotë per masat e marra si dhe dakortësinë që shërbimi transport ‘’Taxi’’ Lezhë i licensuar, gjatë këtij aktiviteti, të ushtrojë pa asnjë pengesë shërbimin taxi.
Po me datë 31.05.2022, është dhënë një deklaratë në media nga shtetasi A.M. 46 vjeç, banues në Lezhë, i punësuar si drejtues mjeti të shërbimit transport ‘’Taxi’’ në Lezhë, ku gjatë prononcimit, ka bërë thirrje për dhunë dhe nxitje të urrejtjes ndaj punonjësve të shërbimit transport ‘’Taxi’’, të shoqërive që kanë lidhur kontratë me organizatorët për eventin UNUM Festival 2022. Pas këtij prononcimi, ky shtetas është shoqëruar në ambientet e Drejtorisë Vendore të Policisë Lezhë, ku është intervistuar mbi prononcimin e dhënë, dhe ndaj tij, për këtë rast, janë referuar materialet procedurale në Prokurorinë e Rrethit Gjyqësor Lezhë për veprën penale ‘’Thirrjet publike për veprime të dhunshme ‘’.
Policia e Lezhës, u bën thirrje dhe njofton të gjithë qytetarët pjesëmarrës në aktivitet, se lëvizja nga qyteti Shëngjin në vendin e zhvillimit të aktivitetit, do të bëhet vetëm me automjete të shërbimit të transportit ‘’Taxi’’ të licensuar si dhe shërbimet e tjera të kontraktuara nga organizatorët për këtë event, me logot përkatëse.
Me këtë rast, kërkojmë mirëkuptimin dhe bashkëpunimin e qytetarëve, për njohjen dhe zbatimin e masave kufizuese, për zhvillimin sa më normal e të sigurt të aktivitetit.
Ftojmë qytetarët që të denoncojnë në Komisariatin Dixhital dhe në numrin pa pagesë 112 , çdo rast të paligjshmërisë duke ju garantuar anonimat të plotë, reagim të shpejtë e profesional.
