Taulant Seferi dhe Endri Çekiçi ishin dy lojtarët e parë që dolën në konferencën e shtypit të Kombëtrares pak orë pas njoftimit të listës nga trajneri Edoardo Reja. Sulmnuesi i Tiranës që rivishet kuqezi, u shpreh i lumtur për këtë rikthim.
“Në ndeshjet e marsit Kombëtarja ka bërë shumë mirë. Ne tani duhet të synojmë vendin e parë në grupin e Ligës së Kombeve. Kemi një grup të fortë lojtarësh dhe besoj shumë se mund t’ia dalim mbanë në objektivin që kemi.
Jam i fokusuar vetëm te Kombëtarja. Konkurrenca është e fortë, por unë kam ardhur këtu për të bërë maksimumin, trajneri vendos. Do të më pëlqente të fitoja besimin e trajnerit, nëse ai më jep minuta do të jem shumë i lumtur. Islanda duhet vlerësuar dhe ne do të shkojmë për të marrë fitoren.”
Ndërkohë, Endri Çekiçi shtoi:
Është trajneri ai që vendos se kush do të luajë por e rëndësishme është që ata që do të luajnë të japin maksimumin. Fitoren e fundit me Islandën duhet ta harrojmë sepse është një ndeshje e re dhe skuadrat kanë ndryshuar.
Të jemi realistë, përjashtimi i Rusisë na i ka bërë më të lehtë grupin. Kemi përpara kundërshtarë me të njëjtin nivel dhe ne duhet të hyjmë në garë për vendin e parë. Kemi shumë besim se do t’ia arrijmë qëllimit. Fakti që vendi i parë është në lojë, na karikon shumë dhe ky është qëllimi jonë kryesor”.
