Nga Boldnews.al
Në daljen e fundit publike gjatë ditës së djeshme, Ministri i Brendshëm Bledi Çuçi kërkoi që më datë 25 kur luhet takimi Roma-Feinord në “Air Albania” edhe sektori privat ta bëjë pushim. Por krimi nuk pushon, këtë herë mu në zemër të institucionit që me kushtetutë është “Mbrojtës i ligjit”. Policët me koburen e shtetit vrasin qytetarë, por vrasin edhe kolegët.
Këtë herë plumbat u zbrazën brenda komisariatit 3 në Tiranë, ku 25-vjeçari Ledian Zaimi me detyrë punonjës i Patrullë së Përgjithshme, qëlloi gjashtë herë mbi kolegun Çaush Saliasi 55 vjeç, duke e plagosur rëndë dhe pak minuta më vonë vdiq në spital. Po ashtu një orë para kësaj ngjarjeje, efektivi i FNSH-së Lutfi Gjyli 48 vjeç në gjendje të dehur qëlloi me armë ndaj një 60-vjeçari me probleme të shëndetit mendor, duke e plagosur rëndë.
Të “çmendurit” e vërtetë janë tjetërkund. Mbajnë poste të larta në polici apo qeveri, ku me frymën e përçuar po nxjerrin në rrugë persona të veshur me uniformë policie, duke u dhënë në duar armën, mjafton që të jesh “ushtar i bindur” i Rilindjes. Periudha më e errët e historisë së policisë shqiptare padyshim që i përket kohës së qeverisjes së Ramës, 2013 dhe në vazhdim. Qindra drejtues policie u kthyen në “investitorë hashashi” duke u bërë njësh me trafikantët. Shumë të tjerë, po nën uniformën e shtetit, dekonspironin operacionet duke ndihmuar krimin e organizuar të largohej me njoftimin “ik se të kapëm”…
Megjithatë në katër vitet e fundit, kur në drejtimin e Policisë së Shtetit erdhi “komandanti” i bindur i qeverisë Ardi Veliu, strukturat e rendit njohën degradimin më të madh. Agresiviteti ndaj protestave qytetare, dhuna e përçuar në çdo drejtim dhe rekrutimi i personave problematik në radhët e punonjësve të policisë janë pasoja që po i vuajmë edhe sot. Në rastin e Ledian Zaimit që shkrehu armën në komisariat duke vrarë kolegun mësohet se ai ishte rekrutuar para një viti e gjysmë.
Jemi pikërisht në kohën kur një tjetër punonjës i Policisë së Shtetit, Nevaldo Hajdaraj ekzekutoi me armën e shërbimit 25-vjeçarin Klodjan Rasha. Arsyeja ishte edhe më e rëndë se vetë krimi. Sipas policisë i riu kishte shkelur orën policore të vendosur për shkak të pandemisë dhe pasi nuk kishte ndaluar ai e qëlloi.
Revolta qytetare për këtë krim të rëndë hëngri kokën e ministrit të Brendshëm të kohës Sandër Lleshaj, një “kokë” që Ramës nuk i duhej më… Ndërsa për Veliun e tij, Rama u shpreh se edhe sikur 500 mijë qytetarë të protestojnë krue i policisë nuk do të shkarkohet. Veliu iku pasi e kishte trashur zullumin dhe Ramës po i ndotej imazhi i stisur kur veç qytetarëve po vriteshin edhe efektivët e policisë. Veliu iku për tu bërë “velinë” e Ministrisë së Infrastrukturës dhe Energjitikës, si zëvendës i Belinda Ballukut, por ajo që la pas në strukturat e rendit është më keq se katasrofa.
Sot janë një pjesë e madhe të rinj që vijnë nga duhma e hashashit dhe për shkak të lidhjeve të duhura politike aplikojnë për kursin 5 mujor të Akademisë së Rendit. Po nën ndikimin e “shefave të mëdhenj” arrijnë të kualifikohen dhe më pas u jepet në duar arma dhe uniforma, e cila edhe ajo është vërtetuar se u prodhua nga paratë e kurrupsionit. Zakonisht të privilegjuarit e partisë kalojnë në Patrullat e Përgjithshme ose në Repartin Shqiponja, ku trajtimi edhe finaciar është më i lartë. Asnjë kontroll tjetër mbi ta, as për përdorimin e armës, as kontroll të testit të narkotikëve e aq më pak mbikëqyrje policore për performancën e tyre.
Kjo lloj forme rekrutimi na la pa tre policë në pak minuta… Njëri është në dhe’, dy në burg, por litarin e policisë së pushtetit e kanë lënë ende jasht, të tjerë priten në radhë nën çmendurinë e pandëshkueshmërisë dhe rekrutimit nëpërmjet lidhjeve politike në pushtet. Megjithatë për aq kohë sa nuk po bëhet një veting i mirëfilltë në radhët e policisë, të paktën të rektrutuarve në kohën e Veliut jepuni një pushkë druri për të shmangur tragjedi të tjera…
