David McAlister deklaroi këtë të Martë nga Tirana se javën e ardhme, në mbledhjen e Partive Europiane në Roterdam, pritet të diskutohet për zhvillimet e fundit në Partinë Demokratike.
David McAlister ndodhet në Tiranë si pjesë e një delegacioni të Komitetit të Punëve të Jashtme të Parlamentit Europian. Ai mbajti një konferencë për mediat, duke shprehur mbështetje për hapjen e negociatave të Shqipërie me Bashkimin Europian.
McAlister, i cili është edhe Zëvendëskryetari i Partive Popullore Europiane (EPP), pjesë e së cilës është dhe PD, u pyet nëse EPP e njeh Sali Berishën si kryetarin e ri të Partisë Demokratike.
Në përgjigjen e tij, McAlister nuk preferoi të flasë për këtë çështje, duke shtuar se është në Tiranë për temën e negociatave.
“Unë jam këtu si kreu i delegacionit të Komisionit Parlamentar për Çështjet e Jashtme dhe jo si përfaqësues i EPP-SE. Ne do kemi një konferencë të EPP-së javën e ardhshme në Bruksel dhe jam shume i sigurt se mes çështjes të tjera do diskutojmë edhe zhvillimet në Shqipëri”, tha ai.
“Ishte goxha përvojë ajo që patëm në 2017 kur patëm nderin të ndihmonim në tejkalimin e disa diferencave politike. Kam simpati për Shqipërinë dhe shqiptarët. Sot jam si kreu i kom parlamentar i çështjeve të jashtme. Sot nuk kam mundësi të bëj komente publike për çfarë po ndodh në PD. Të jeni të sigurt se në kapacitetin tim si anëtar i CDU po i ndjekim të gjitha zhvillimet në PD nga afër dhe do përpiqemi të japim mbështetjen tonë si EPP që të tejkalohen dallimet ose ndasitë”, shtoi David Mcallister.
