Kupa e Botës mbërriti sot në Shqipëri si pjesë e një turi që po bën në vende të ndryshme. Turneu do të vizitojë të 32 vendet që u kualifikuan për “Kupën e Botës FIFA”, duke frymëzuar tifozët në mbarë botën.
I pranishëm në ceremoninë e mbërritjes së trofeut të turneut “FIFA Ëorld Cup”, ishte kryebashkiaku Erion Veliaj i cili dha mesazhin se sporti i bashkon njerëzit.
Për këtë eveniment ka reaguar ashpër, legjenda e futbollit shqiptar, Sulejman Demollari, i pranishëm në ceremoni, teksa deklaroi se ajo që duhet të ishte në fakt një eveniment për të bashkuar njerëzit ashtu siç deklaroi kryebashkiaku, në fakt ishte e kundërta teksa ky trofe u mbajt larg dhe ishte fshehur edhe për njerëzit e futbollit.
Postimi i Demollarit:
Na ftuan sot për të parë Kupën e Botës por nuk na lanë as të bëjmë një foto. Ishte e turpshme që të shikoja aq figura të mëdha futbolli në atë ceremoni dhe Kupa ishte fshehur për ne njerëzit e futbollit.
Vetëm Coca Cola mund ta bëj që të të ftojë për ceremoninë e ardhjes së Kupës së Botës në Tiranë dhe të të mbaj larg nga trofeu dhe të na tregoj muzeun e FSHF që ishte spostuar në hollin e Kryeministrisë.
Si ish kapiten i ekipit Kombëtar dhe me kontribute në këtë futboll, nuk jam ndjerë asnjëherë më i ofenduar sesa sot nga një sjellje e tillë.
Kam qënë në aktivitete të njëllojta kudo nëpër botë, por asnjëherë në një turp me si kjo me Coca Cola.
