Elon Musk mohoi akuzat se ai kishte ngacmuar seksualisht një stjuardesë të ‘SpaceX’ në vitin 2016 në një seri postimesh në Twitter.
“Unë kam një sfidë për këtë gënjeshtar që pretendon se shoqja e tij më pa ‘të ekspozuar’ – përshkruaj vetëm një gjë që nuk dihet nga publiku. Ajo nuk do të jetë në gjendje ta bëjë këtë, sepse nuk ka ndodhur kurrë”, -shkroi në Twitter CEO i Tesla dhe SpaceX .
Tweet-i vjen pasi ‘Business Insider’ raportoi se SpaceX pagoi 250,000 dollarë në vitin 2018 pasi një stjuardesë e SpaceX pretendoi se Musk e ngacmoi seksualisht. Sipas akuzave Musk ishte ekspozuar ndaj saj me organin gjenital në ereksion, e kishte fërkuar në këmbë pa i marrë leje dhe i kishte ofruar t’i blinte një kalë nëse ajo i kryente një masazh erotik, sipas intervistave e dokumenteve të publikuara nga Business Insider.
Incidenti në fjalë kishte ndodhur në 2016 dhe marrëveshja ishte arritur në 2018. Stjuardesa që nuk përmendet me emër nga ‘Insider’ thotë se i ishte kërkuar të shkonte në kabinën e Musk gjatë një fluturimi drejt Londrës, për t’i bërë “masazh të plotë trupor”. Kur hyri në dhomë ajo gjeti Musk “tërësisht të zhveshur, përveç një çarçafi që i mbulonte pjesën e poshtme të trupit”.
