Teksa vijon mbledhja e një pjesë prej deputetëve të Partisë Demokratike lidhur me çështjen e Presidentit të ri, janë zbardhur dhe propozimet e para.
Mbledhja është thirrur në selinë blu nga Alibeaj, i cili pretendon se është kryetari i grupit parlamentar të PD, edhe pse Komisioni i Rithemelimit e shkarkoi nga ky post në Kuvendin e fundit Kombëtar.
Në mbledhjen e thirr nga Alibeaj gjithsesi morën pjesë 23 deputetë. Në mbledhje janë dhënë disa propozime.
Mësohet se Ferdinand Xhaferaj ka propozuar Leonard Demin për kandidat për president. Ai ka qenë ish-deputet i PD, ish-kryetar i Komisionit të Sigurisë dhe ish-ambasador i Shqipërisë në NATO.
Ndërsa Flamur Hoxha ka propozuar Arben Çejkun, edhe ai me karrierë diplomati. Më herët, ka qenë ish-Ambasadori i Shqipërisë në Kosovë dhe Maqedoni.
Sakaq, deputeti i Korçës, Bledjon Nallbati ka propozuar si kandidat për President, emrin e ish-ministrit të Brendshëm dhe ish gjeneralin, Dritan Demirajn.
Burimet bëjnë të ditur se Kreshnik Çollaku ka propozuar emrat e Dashamir Shehit dhe Jorida Tabakut, ndërsa Sajmir Koreshi emrin e Visar Zhitit.
Emri i Dashamir Shehit është propozuar edhe nga Xhelal Mziu, i cili e ka pasuruar listën edhe me Rexhep Ukën dhe Halim Kosovën.
Ndërsa Dhurata Çupi ka propozuar emrin e Princ Lekës.
Rexhep Uka dhe Lajla Pernaska po ashtu u propozuan në mbledhje.
Rithemelimi nuk njeh mbledhjen e Alibeajt
Nga ana tjetër, deputeti demokrat Oerd Bylykbashi, pjesë e Komisionit të Rithemelimit, akuzoi për marrëveshje të fshehtë mes Alibeajt dhe Ramës për zgjedhjen e Presidentit të ri. Në një pronononcim nga selia blu më herët gjatë ditës, Bylykbashi tha se Alibeaj pranoi marrëveshjen që i ofroi Taulant Balla për llogari të Ramës.
Sipas tij, Rama kërkon që kandidatin e tij të preferuar ta sjellë opozita e caktuar prej tij dhe ajo t’i sigurojë 84 votat për ta shitur si president konsensual.
Bylykbashi shtoi se PD nuk e njeh marrëveshjen Alibeaj-Rama.
