Një 29-vjeçar është arrestuar nga policia e Tiranës pasi akuzohet se ka shantazhuar një vajzë 19-vjeçe nga Brazili me publikimin e një videoje intime. Në pranga u vu Eraldo Dervishi.
Arrestimi
“Shërbimet e Komisariatit të Policisë Nr. 6, pas kallëzimit të marrë nga një shtetase 19 vjeçe nga Brazili, se një shtetas e shantazhonte për dhënie pasurie që të mos i publikonte një video në rrjetet sociale, menjëherë kanë organizuar punën për identifikimin dhe kapjen e autorit të dyshuar dhe kanë finalizuar operacionin policor të koduar ‘Extortion’. Brenda pak orësh, është bërë lokalizimi dhe arrestimi në flagrancë i shtetasit E.D., 29 vjeç, banues në Tiranë, për veprën penale ‘Shtrëngimi me anë të kanosjes ose dhunës për dhënien e pasurisë’”, njoftoi policia.
Video
Të njëjtat burime shtojnë se gjatë veprimeve hetimore ka rezultuar se 29-vjeçari i kishte marrë pasaportën 19-vjeçares të cilën e shantazhonte që t’i jepte shuma të caktuara parash për mospublikimin e disa videove që ai dispononte.
Materialet i kaluan Prokurorisë, për veprime të mëtejshme procedurale, mbyllet njoftimi i bluve.
