Policia e Bulqizës ka sekuestruar një pistoletë sinjalizuese, dhjetëra ora të dyshuara të kontrabanduara, një shumë parash dhe një automjet.
Ndërkohë, është proceduar penalisht poseduesi i tyre, pasi nuk dispononte faturë për mallrat dhe as dokumentacion që vërteton burimin e ligjshëm të shumës së eurove që iu gjetën në banesë.
“Në vijim të kontrolleve për parandalimin dhe goditjen e paligjshmërisë, bazuar dhe në informacione të marra në rrugë operative se një shtetas posedonte mallra të dyshuara të kontrabanduara, shërbimet e Policisë kanë organizuar punën dhe kanë ushtruar kontroll në banesën e shtetasit J. LL. Në banesën e tij janë gjetur dhe sekuestruar në cilësinë e provës materiale një pistoletë sinjalizuese, dhjetëra ora dore të markave të ndryshme, të kontrabanduara, që dyshohet se janë vjedhur në vendet e BE-së, një shumë e konsiderueshme eurosh e dyshuar e përfituar nga veprimtaria kriminale, si dhe një automjet”, njofton policia.
Në përfundim të veprimeve të para hetimore, nga specialistët e Seksionit për Hetimin e Krimit Ekonomik e Financiar në DVP Dibër është proceduar penalisht në gjendje të lirë shtetasi J. LL., 30 vjeç, banues në Bulqizë.
Në bashkëpunim me Prokurorinë vijon puna për dokumentimin e plotë të kësaj veprimtarie, ndërsa materialet procedurale i kaluan Prokurorisë pranë Gjykatës së Shkallës së Parë Dibër, për veprime të mëtejshme, përfundon njoftimi i bluve.
