Iuliana Marciuc, e cila ishte kryetare e delegacionit të Rumanisë në Eurovision, ka deklaruar se nuk ishin të njoftuar se pse pikët maksimale të shtetit të tyre iu dhanë Ukrainës e cila u shpallë fituese, e jo Moldavisë që ata kishin vendosur.
Ajo ka bërë këto deklarata në televizionin kombëtar atje TVR News, duke thënë se nuk e di deri tani pse votat e jurisë të Rumanisë janë ndryshuar dhe 12 pikët që ata i kishin dhënë Republikës së Moldavisë i kanë shkuar Ukrainës. Marciuc gjithashtu saktësoi se gjykimi në Bukuresht është bërë duke respektuar rregulloren e EBU-së, nga e cila pret një përgjigje për këtë situatë.
“Telefonova Bukureshtin, kërkova të më jepnin partiturën, pasi deri atëherë nuk e dija dhe kërkova detaje për mënyrën e organizimit të jurisë në studio. Mësova se ishte organizuar me të gjitha rregullat e vendosura nga EBU, me praninë e një noteri të detyrueshëm, një noteri që do të mbërrinte në studio përpara anëtarëve të jurisë. Anëtarët e jurisë nuk mund të komunikonin me njëri-tjetrin, nuk mund të flisnin, secili firmosi jurinë e tij, nuk panë rezultatin total të jurisë. Në këtë mënyrë nuk e dimë se cili është problemi i kësaj jurie”, tha Iuliana Marciuc.
TVR akuzon Unionin Evropian të Transmetuesve (EBU), organizatorin e Eurovizionit, se ka ndryshuar rezultatin e votimit të jurisë rumune pa shpjeguar arsyet, pak pasi u zbulua se votimi në Rumani dhe pesë vende të tjera nuk u mor parasysh.
“U befasuam kur konstatuam se rezultati i votimit të jurisë rumune nuk u mor parasysh në përllogaritjen e renditjes përfundimtare, organizatorët u caktuan një grup tjetër pikësh konkurrentëve në finale, në emër të jurisë së vendit tonë. Saktësojmë se juria rumune vendosi t’i japë pikë maksimale përfaqësuesve të Moldavisë”, shkruhet në komunikatën e TVR.
Gjatë finales së Eurovision, Unionin Evropian i Transmetuesve (EBU) kishte lëshuar një deklaratë ku sqaronte se në përpjekje të dyshuara për të manipuluar votimin e jurisë ata hoqën votat e jurisë nga gjashtë vende.
Votat nga Azerbajxhani, Gjeorgjia, Mali i Zi, Polonia, Rumania dhe San Marino u zëvendësuan të gjitha me rezultatin e ri.
