Mirel Josa është rikthyer në krye të Vllaznisë, që do ta drejtojë për të tretën herë. Tekniku kryeqytetas është prezantuar sot para mediave, teksa ka deklaruar: “Më duket vetja sikur kam ikur shumë pak kohë më parë nga Shkodra. Kam marrë këtë skuadër pak me ndrojtje në 2016. Kjo është hera e tretë dhe sa herë kam punuar me skuadra të tilla, kam ndjerë një farë ngrohtësie nga populli shkodran.
Edhe 3 ndeshje mbaron kampionati. Mu duk e çuditshme të merrja skuadër në këtë momente, por erdha me dëshirë të madhe këtu. Në momentin që biseduam me presidentin ishim në një linjë për sa i përket skuadrës për sezonin e ardhshëm. Kjo epokë s’ka mbaruar akoma, mbaron me datë 31. Kam qenë dhe trajner te Laçi. Një skuadër që më ka pëlqyer, por është një skuadër me pikësynimet e veta”.
“Nuk ka gjëra për të ndryshuar. Por më pas çfarë do të ndryshojë Josa, është diçka që do ta shikoni. Ju e dini punën tonë, varet nga rezultatet. Më pëlqeu sinqeriteti. Kur pashë sinqeritet mes dy palëve, të gjitha gjërat do të shkojnë mirë. Ne kemi një objektiv dhe i yni është të kapim Europën. Në futboll nuk ka parashikime. Unë kam qenë dy herë kundërshtari i Vllaznisë me Laçin.
Ne duhet ta bëjmë veten tonë më të fortë, sepse është vetëm një ndeshje. Përpara se të shkojmë te finalja e Kupës, duhet të takohem me futbollistët, që janë vegla pune. Nëse të gjitha këto faktorë bien në një emërues të përbashkët, mendoj se atëherë arrihen te objektivat”.
“Unë jam gati për këto ndeshjet e fundit. Pastaj gjërat e tjera dalëngadalë vijnë duke parë. Nuk luhet futbolli duke i shpuar njerëzit me gjilpërë. Unë do t’i shohë aftësitë e futbollistëve. Unë i kam parë më përpara, kur kam qenë kundërshtarë ose kur kam qenë duke parë Vllazninë në tribuna. Kjo bëhet me bindje sepse futbollisti ka aftësitë për të bërë gjëra në fushën e lojës, qoftë dhe në dhomat e zhveshjes.
“Hakmarrje ndaj Laçit? Jo, fare. Madje e falënderoj për mundësinë që më dha për të njohur ambientin laçian. Ashtu është mësuar për të funksionuar ajo skuadër. Dhe ashtu do të vazhdojë të funksionojë. Edhe Vllaznia ashtu do të fillojë të funksionojë.
E falënderoj Laçin sepse është hera e parë që flas. Mirënjohja është një problem tjetër, për të cilin unë këtu në Shkodër e kam pasur, qoftë me drejtuesit, qoftë nga drejtuesit e tjerë, qoftë nga tifozeria. Unë ambientin e kam të mirë. Problemi është që këtyre lojtarëve t’i marrim maksimumin”, tha Josa.
