Deputeti i PD, Enkelejd Alibeaj, ka reaguar përmes rrjeteve sociale mbi shfaqjen komuniste në Cërrik, ku nxënës shkollash shfaqeshin me shallët e pionerëve, duke bërë roje nderi në një lapidar, me rastin e 79 vjetorit të Batalionit Partizan të Dumresë.
Alibeaj në reagimin e tij shkruan se pak muaj me parë, një deputet i Partisë Socialiste i thurte hosana figurës së diktatorit komunist Hoxha.
“Provokim i hapur i pinjollëve të komunizmit ndaj viktimave dhe një populli të tërë, ndaj plagëve të pambyllura të persekucionit, vrasjeve pa gjyq, burgosjeve e internimeve, shtypjes së fjalës së lirë.
Asnjë fjalë pendese, as sa për sy e faqje, nga pushteti. Thjesht lënie në harresë. Në fakt ashtu siç ka ndodhur për këto 30 vjet.
Nuk ka dhimbje më të madhe sesa kur ndjen, që në vendin, e ndaj popullit, më të vuajtur nga diktatura komuniste, pendesa mungon, falja refuzohet dhe harresa promovohet. Simptomat më energjike këto që mentaliteti diktatorial të ruhet ende i patrazuar.
E sikur hipokrizia e tranzicionit postkomunist të mos mjaftonte, provokimet sistematike të nostalgjikëve të komunizmit po iu vardisen edhe brezit të ri, nxënësve në shkolla, sic ndodhi dje në Cerrik ! Dekomunistizimi i shoqërisë shqiptare, i sinqertë, real, i plotë dhe i ndjerë është ajo çka ka nevojë ky vend sot!
Mund dhe duhet ta bëjmë!”, shkruan ai.
