Finalizohen dy operacione policore, të koduara “Camouflage 5” dhe “Hostel” për goditjen e veprimtarisë kriminale të dhënies ndihmë shtetasve të huaj, për kalim të paligjshëm të kufirit.
Gjatë operacionit policor të koduar “Camouflage 5” u arrestua në flagrancë 40 vjeçari banues në Tiranë dhe u shpall në kërkim një 24 vjeçar, pasi akuzohen se po bashkëpunonin për të ndihmuar 5 emigrantë, për të kaluar kufirin në mënyrë të paligjshme.
“Këta shtetas, në bashkëpunim me njëri-tjetrin, kundrejt shpërblimit monetar, kryenin transportin e emigrantëve të paligjshëm, nga Devolli në Tiranë. Më pas, pasi i strehonin emigrantët e paligjshëm në Tiranë, me ndihmën e personave të tjerë, kryenin transportin e tyre drejt Kukësit, me qëllim kalimin në Kosovë dhe më pas në vendet e BE-së” ,- informoi sot policia.
Gjatë operacionit policor të koduar “Hostel”, u arrestua në flagrancë një 59 vjeçare pasi akuzohet që strehonte në hotelin e saj, 9 emigrantë, të cilët do t’i ndihmonte për të kaluar kufirin në mënyrë të paligjshme.
“Kjo shtetase kishte strehuar në hotelin që administronte, në Laprakë, 9 emigrantë që kishin hyrë në mënyrë ilegale në Shqipëri, të cilëve, kundrejt shpërblimit monetar, iu kishte premtuar dhënien ndihmë për transportimin e tyre, drejt pikave të kalimit kufitar’ informon policia e Tiranës.
Procedohen penalisht edhe 14 emigrantët e paligjshëm.
