Kuvendi i Shqipërisë do të konsumojë me 16 maj raundin e parë për zgjedhjen e Presidentit dhe me shumë gjasë ky raund do të digjet, pasi asnjë nga palët nuk do të paraqesë ndodnjë emër konkret për t´iu nënshtruar votimit.
Ditën e premte, Taulant Balla do të takohet me Mesila Dodën dhe më pas me Fatmir Mediun, por sikundër mësohet asnjë prej dy deputetëve të opozitës që drejtojnë grupe parlamentare nuk kanë ndonjë emër që mund ta hedhin në tavolinë. Në anën tjetër socialistët janë të pashqetësuar pasi e kanë të qartë se Presidentin, bazuar në Kushtetutë mund ta zgjedhin në raundin e 4 apo të 5 me 71 vota.
Nga Komisioni i Rithemelimit, dy negociatorët e mandatuar për çështjen e Presdentit të ri, Oerd Bylykbashi dhe Luçiano Boçi, janë takuar me kreun e republikanëve Fatmir Mediu, Monika Kryemadhin e LSI-së, Vangjel Dulen e PBDNJ dhe Agron Dukën e Partisë Agrare.
Fatmir Mediu i cili është më i përfshiri nga opozita, thotë se propozimi i tyre është që opozita të dalë vetëm me një kandidaturë të vetme, e cila të jetë mbi palët politike dhe me kriteret që përcakton kushtetuta.
Po ashtu Mediu tha se nesër nuk kanë si propozim asnjë emër konkret. “Nesër nuk do të shkojmë me asnjë emër konkret sepse asnjë emër nuk duhet të dalë në një mënyrë të njëanshme dhe ky emër duhet të jetë i konsultuar me të gjithë deputetët e opozitës”, sqaroi ai.
Kështu në dispozicion mbetet e shtuna deri të dielën në orën 16:00 që është afati i fundit për paraqitjen në Kuvend të dokumentacionit mbi kandidatin ose kandidaten e mundshme për President.
