Kryebashkiaku i Tiranës, Erion Veliaj, shquhet gjithmonë për gjetjen e zgjidhjeve të vështira. Madje ai është ekspert në çdo fushë, përfshi edhe ato të hotelerisë.
E ndërsa pak ditë më parë një prej drejtuesve të shoqatave të turizmit në Shqipëri denoncoi abuzimin që po ndodhte me çmmimet e dhomave të hoteleve mes datave 23-25 maj, ku një natë hoteli faturohet deri në 8 mijë euro, Veliaj ka gjetur edhe shkakun.
“Tirana nuk ka më dhoma! E keni vënë re që të njëjtat gazeta që thoshin se finalja do të shkojë në Athinë, janë po të njëjtët që shajnë. Shumica e tyre nuk e kuptojnë një gjë bazike: kur një hotel është futur në një shërbim global, siç është Booking.com, ndërtesa dhe hipoteka mund të jetë e jotja, por e drejta e hotelit për të dalë në treg i është dhënë algoritmit të aplikacionit, pra të agjencive turistike që bëjnë prenotimet. Kultura që ne shajmë veten tonë duhet të marrë fund. Janë të njëjtët këta që thonë po rritin çmimet”, tha Veliaj para Këshillit Bashkiak, ku foli edhe për projektvendimin e kalimit të një fondi special për organizimin e finales së Conference League në kryeqytet. Veliaj e cilësoi atë si një ngjarje të jashtëzakonshme për qytetin, që do i shërbejë për mirë Tiranës.
“Kemi një projektvendim për kalimin e një fondi që do të shërbejë për organizimin, transportin dhe dekorimin e qytetit, lidhur me finalen e Conference League, një ngjarje e jashtëzakonshme që i sjell shumë biznes qytetit. Ne nuk e kemi betejën vetëm me një personazh në FSHF, por me të gjithë histerinë kolektive që na kaplon kur duhet ta zhvillojmë këtë qytet. Ja ku erdhi dita që qyteti nuk ka më dhoma hoteli. Për të gjithë ata cinikë dhe skeptikë profesionistë, që thonë çfarë na duhen këto kullat, ja ku jemi sot”, tha Veliaj.
