Ish-Kryeministri Sali Berisha u shpreh se një nga aferat që duhet hetuar është ajo ku humbën jetën qytetarët nga tërmeti i 26 nëntorit.
“Mos harroni viktimat e Thumanës, janë 24 jetë të humbura, që e pritën tërmetin vdekjeprurës në banesat e dëmtuara nga tërmeti i mëparshëm dhe kjo ndodhi për shkak të papërgjegjshmërisë së qeverisë dhe kryebashkiakëve të saj. Mos harroni viktimën te Kavalishenca, ku drejtor ishte daja i Taulant Ballës. U tha se godina nuk kishte dëmtime, kur atje u shemb një godinë dhe humbi jetën një oficer i lartë policie”, tha Berisha.
Ai u shpreh se dokumentet shtetërore të ekspertëve kishin nxjerrë në ekspertizat e tyre për këto godina të dëmtuara nga tërmeti i shtatorit, ndërsa pas dy muajsh nga tërmeti i 26 nëntorit, ato u shembën duke marrë jetë njerëzish.
Berisha i cilësoi këto si vrasje shtetërore të pahetuara.
