Ish-trajneri i Dinamos, Bledi Shkëmbi i është rikthyer temës së Bluve dhe largimit të Xhuliano Skukës nga ekipi në merkaton e janarit drejt Partizanit. Për gazetaren Enxhi Biba, Shkëmbi ka thënë se mbase do duhej t’i jepte më shumë mundësi dhe besim për ta mbajtur në ekip. Për korçarin problemet te Dinamo janë të thella, me Nëndetësen që është me një këmbë në Kategorinë e Parë.
“Skuka? Unë kam një mendim siç e kam parë kur e stërvitja, që është një lojtar me shumë të ardhme. Ka të dhëna shumë të mira por duhet të ndryshojë, edhe atë mendimin për veten, me mënyrën se si duhet të sillet, që të bëhet edhe më i mirë. Padyshim te Partizani ka ndryshuar për mirë, ka fituar besim edhe më shumë se sa ka pasur dhe po bën mirë.
Më bëhet qejfi, pavarësisht asaj që mendojnë të tjerët. Edhe unë e mendoj tani që mund t’i kisha dhënë më shumë besim dhe mund ta kisha mbajtur në ekip, por ishte vendim që e morëm bashkërisht si klub. Mendoj se edhe qëndrimi i Skukës te Dinamo nuk do të ndryshonte diçka të madhe sepse gjërat te Dinamo janë më të thella dhe nuk varen nga një lojtar”, tha Shkëmbi.
