Arrestimi i Drejtorit të Ujësjellësit të Kurbinit Alfred Prodani, pasi ka grabitur sulmuesin e Realit të Madridit, Karim Benzema, po bën bujë jo vetëm në Shqipëri, por edhe në mediat e njohura sportive europiane.
Gazeta spanjolle, “Marca”, shkruan në titullin për arrestimin e Prodanit: “I arrestuari për grabitjen e shtëpisë së Benzemasë… është një zyrtar i lartë nga një qeveri e huaj”.
Ndërkohë, që prestigjiozja tjetër spanjolle, “AS” shkruan në titullin e saj: “Një zyrtar i lartë nga Qeveria Shqiptare është arrestuar për grabitjen e shtëpisë së Benzemasë gjatë Klasikes”.
Gjykata e Kurbinit ka dhënë masën e sigurisë “arrest me burg”, me afat 40 ditë për drejtorin e ujësjellësit Alfred Prodani, i cili u arrestua pasi dyshohet për dhjetra vjedhje të ndodhura në Spanjë.
Burgu me afat 40 ditë është dhënë me qëllim që gjatë kësaj kohe të plotësohen dokumentet për ekstradimin e tij drejt Spanjës, ku do të përballet me drejtësinë vendase.
Alfred Prodani dyshohet se ka kryer vjedhje në Spanjë, ndërtë tjera se ka grabitur edhe në banesën e yllit të Real Madrid, Karim Benzema.
Në vitin 2019-të u denoncua dhe nga ish-kryeministri Sali Berisha, se kishte marrë pjesë në grabitjen e shtëpisë së yllit të Real Madrit, Karim Benzema. Por në atë kohë, 41-vjeçari i quajti akuzat e Berishës si të stisura dhe të motivuara politikisht. Alfred Prodani u arrestua, në kuadër të operacionit koduar “Coruna”, i cili u finalizua disa ditë më parë nga forcat policore të Komisariatit të Policisë Kurbin, në bashkëpunim me Interpol Tirana.
41-vjeçari banues në Kurbin u prangos pa bërë rezistence në qytetin e Laçit, ndërsa ndalimi i tij u bë me qëllim ekstradimi drejt Spanjës. Ai ishte shpallur në kërkim, pasi Gjykata Coruna në Spanjë, në vitin 2013, ka lëshuar urdhër arresti ndërkombëtar, për veprën penale “Vjedhja me dhunë”, parashikuar nga Kodi Penal i Spanjës” informon Policia e Lezhës.
Prej 9 vitesh, Alfred Prodani mbante postin e Drejtorit të UjësjellësKanalizime në Kurbin, si përfaqësues i Partisë Socialiste. Më firmosjen e marrëveshjes së ekstradimit mes dy vendeve rreth dy muaj më parë, Interpol Tirana në bashkëpunim me drejtoritë e policive në qarqe po gjurmon të gjithë personat e kërkuar nga shteti spanjoll, me qëllim që ata atë ekstradohen dhe të përballen me drejtësinë për veprat penale që akuzohen.
