“Komisioni i Rithemelimit” ka njoftuar zhvillimin e një mbledhjeje në orën 19:00 në selinë e PD.
Nga raportimet, mësohet se një nga pikat që do të diskutohet është ajo lidhur me procesin për zgjedhjen e presidentit të ri, pasi deputetët e opozitës nuk janë shprehur as pro dhe as kundër propozimit të PS që u votua nga maxhoranca.
Në rezolutën që u miratua nga Këshilli Kombëtar i PD thuhej se do të përcaktohej një grup negociator që do të përfaqësonte partinë më të madhe të opozitës lidhur me Presidentin, ndërsa në anën tjetër duket se Edi Rama po vijon lojën e tij duke njohur si negociator Enkelejd Alibeajn dhe disa deputetë, që shfaqen si mbështetës të tij.
Ditën e sotme u mblodh Konferenca e Kryetarëve, ku u vendos vetëm me votat e maxhorancës që në 16 maj ora 17:00 të mblidhet Parlamenti për të zhvilluar raundin e parë të zgjedhjes së Presidentit të ri të vendit.
Në mbledhje u vendos gjithashtu që afati i fundit për paraqitjen e dokumentacionit nga kandidatët të jetë 15 maji ora 16:00, ndërsa një ditë më vonë në 16 maj në orën 10:00 do të mblidhet Komisioni i Ligjeve për shqyrtimin e kandidaturave.
