Pritjes i erdhi fundi! Mbrëmjen e sotme do të mbahet gjysmëfinalja e shumëpritur e Eurovision 2022. Ky event i madh për muzikën evropiane do të zhvillohet në vendin fqinj, Itali.
Detyrën për të përfaqësuar Shqipërinë këtë vit në këtë kompeticion e ka marrë këngëtarja, Ronela Hajati. Ajo pritet të hapë siparin e Eurovision, sonte këngën e saj “Sekret”.
Këtë lajm e ka bërë vetë të ditur Ronela me anë të një postimi në instagram. Në këtë postim ajo ka publikuar edhe listën e vendeve që mund të votojnë vendin tonë në këtë gjysmëfinale. 01 është kodi që mban Ronela dhe Shqipëria për personat që do të votojnë.
“Këto janë të vetmet shtete që mund të votojnë për Shqipërinë sot në gjysëmfinale,”- shkruan këngëtarja poshtë fotos.
Ju kujtojmë që këtë vit në Eurovision konkurojnë 41 shtete përfaqësuese. Ndërsa finalja e madhe do të mbahet të shtunën datë 14 maj.
Gjithashtu, ditën e djeshme u zhvillua ceremonia e hapjes së ‘Eurovision’. Të gjithë përfaqësuesit e vendeve pjesëmarrëse parakaluan në Reggia di Venaria Reale, përgjatë tapetit Turquoise, 200 metra të gjatë.
Këngëtarja shqiptare veshi një fustan spektakolar me një kapele katrore. Veshje që bëri bujë të madhe pasi u konsiderua e kopjuar nga artisti brazilian.
