KPK shkarkoi sot nga detyra prokurorin e Gjirokastrës, Emror Kasaj.
Prokurori i Gjirokastrës u përball me Komisionin e Pavarur të Kualifikimit më 5 maj lidhur me problemet në kriterin e figurës dhe profesionalizmit.
Nga analiza financiare paraprake për periudhën 2010-2016 Kasaj rezulton me balancë negative në vlerën e 31 milionë lekëve.
Kasaj e kundështoi analizën e KPK-së gjatë seancës parardhëse. Ai pretendoi se ishte treguar “naiv i madh” në një sërë transaksionesh, që sipas relatimit të Komisionit e nxirrnin me deklarime të rreme, pasuri të fshehur dhe cënim të besimit të publikut tek drejtësia.
Kasaj u pyet nga vëzhguesi ndërkombëtar Steven Kessler lidhur me marrëdhënien që kishte me kompaninë e biznesmenit Shkëlqim Fusha, prej nga kishte marrë një hua në shumën 140 mijë euro.
Kasaj deklaroi se biznesmeni Shkëlqim Fusha në atë periudhë nuk ishte kaq i fuqishëm sa është sot dhe as person publik.
“E dija që merrej me ndërtime,” pohoi subjekti dhe sqaroi se kur një shoqëri me të cilën ishte dakordësuar për të kryer investim në tokën që zotëronte ishte tërhequr, atëherë i kishte shkuar mendja tek kompania “Fusha”.
Kessler e pyeti se çfarë do t’i jepte në këmbim të vlerës 140 mijë euro kompanisë “Fusha”, ndërsa Kasaj u përgjigj se kompania do të ndërtonte në pronën e tij dhe ato para do të përllogariteshin në sipërfaqen e ndërtimit që do t’i takonte. “Ai kishte interesin e tij. Nuk do të më jepte katër apartamente, por do të më jepte dy ose një apartament,” shtoi ai.
Pas insistimit të vëzhguesit ndërkombëtar se në çfarë rrethanash i ishte besuar një vlerë e tillë prej kompanisë “Fusha”, subjekti këmbënguli se gjithçka ishte kryer në mirëbesim. “Ai e dinte që Emror Kasaj ishte burrë i ndershëm. Ashtu mendova dhe unë për ortakun tim dhe ia dhashë atij zotërisë një pjesë së vlerës së huasë. Kjo më ka kushtuar sa nuk e imagjoni dot,” pohoi Kasaj dhe shtoi se ishte kujdesuar vetë që të hartonte shkresa tek një avokat lidhur me huanë që kishte marrë.
Drejtoria e Sigurimit të Informacionit të Klasifikuar, DSIK ka konstatuar fillimisht përshtatshmërinë e prokurorit Kasaj për të vazhduar detyrën. Pas përditësimit të raportit janë referuar informacione për përfshirjen e tij në korrupsion pasiv dhe për ndikim të paligjshëm në një proces penal.
Bazuar në këto të dhëna, DSIK ka ndryshuar raportin duke konstatuar papërshtatshmërinë e prokurorit Kasaj në këtë kriter rivlerësimi.
Relatori Komici pohoi se bazuar edhe në të dhëna të tjera të institucioneve ligjzbatuese, duket se informacionet përputhen me rezultatet e hetimit. Megjithatë, ai vërejti se konstatimet dhe shpjegimet e subjektit do të vlerësohen në vendimarrjen përfundimtare.
Prokurori Kasaj theksoi se në materialet që i janë dhënë nuk gjente asnjë rast që të kishte ushtruar korrupsion. “Kam punuar vetëm me përkushtim, profesionalizëm dhe guxim,” pohoi Kasaj dhe për ndryshimin e raportit fajësoi raportimet në media.
Subjekti pranoi se kishte udhëtuar me një gjyqtare për të ndarë shpenzimet, por sipas tij, asnjëherë nuk kishte ushtruar ndikim. Ai vërejti se në rastin për të cilin ngriheshin dyshime kishte kërkuar “arrest në burg” ndaj të proceduarit, ndërsa gjyqtarja kishte vendosur masë tjetër, “detyrim për paraqitje”.
Gjithashtu Kasaj rezultoi me probleme edhe në kriterin e profesionalizmit.
