Tre personat që grabitën filialin e BKT në Koplik ende nuk janë arrestuar, ndërsa nga raportimet mësohet se policia ka nisur një operacion të gjerë, duke përdorur edhe helikopterët për të rënë në gjurmët e grabitëse.
Autorët pasi kanë grabitur filialin e bankës u larguan drejt Hanit të Hotit me një makinë “Golf 3” që më pas i kanë vënë flakën.
Pasi kanë djegur golfin autorët e dyshuar kanë ndaluar një “Benz” kanë zbritur tre persona që ishin në këtë automjet dhe u kanë grabitur edhe makinën.
Të njëjtat burime bëjnë të ditur se kanë nisur kërkimet edhe me ndihmën e një helikopteri për të rënë në gjurmët e autorëve.
Ndërkohë policia ka nisur marrjen në pyetje të 3 personave që grabitësit u morën makinën në rrugë.
Ende nuk ka të dhëna mbi sasinë e parave që u morën nga banka, ndërsa personat që kryen grabitjen ishin të armatosur dhe të maskuar.
