Deputeti i PD-së, Lefter Gështenja, mendon se kjo parti ndodhet edhe në krizë legjitimiteti.
Ai tha se palët duhet të ulen në tavolinë për të gjetur pikat e përbashkëta në mënyrë që demokratët të bashkohen.
“Ne jemi në një krizë politike, bashkëpunimi por edhe në një krizë legjitimiteti. Ne duhet të ulemi me urgjencë në një tavolinë për të gjetur pikat që ne të bashkohemi për të qenë të gjithë bashkë. Kjo është rruga e vetme që ne duhet të rifillojmë gjithçka nga e para. Nuk është e vërtetë që përçarja e PD është vetëm në bazë, por në të gjithë nivelet e PD, përfshirë dhe strukturat bazë”, tha Gështenja për Oranews.
Sipas tij, procesi i rifilluar nga Komisioni i Rithemelimit ka qenë një proces i njëanshëm, ndërkohë shtoi se gjithçka duhet të nisë nga e para.
“Procesi i rifilluar nga Komisioni i Rithemelimit ka qenë një proces i njëanshëm dhe i tillë është mbyllur. Ndihem i keq-ardhur e ka kontestuar këtë dhe një pjesë e deputetëve kanë kërkuar që ky proces ishte i njëanshëm. Nuk kishte gjithpërfshirje në strukturat bazë. Nëse e duam hapjen e PD, duhet që procesi të nisë nga e para. PD duhet të jetë demokratike reale”, shtoi ai.
