Ajas Sulejmani, 39 vjeçari, i cili ishte në drejtimin e automjetit tip “G Class” që shkaktoi aksidentin e rëndë në rrugën e Kavajës në Tiranë dhe më pas u largua nga vendi ngjarjes, ka qenë në kërkim nga sherifi i DuPage County në Ilnois të SHBA.
Ai ka qenë në kërkim në vitin 2014 për çështje narkotikësh.
Aksidenti i rëndë ndodhi mesditën e sotme te rruga e Kavajës, pranë asaj që njihet si zona e Parkut të Autobusëve.
Një çift bashkëshortësh dhe fëmija e tyre 3 muajsh u përplasën nga automjeti. Sipas asaj që njoftoi policia, ata janë dërguar në spital ku ndodhen nën kujdesin e mjekëve.
Ndërkohë shoferi braktisi makinën “G Class” dhe u largua nga vendi i ngjarjes pas aksidentit.
Policia arrestoi pak minuta pas ngjarjes një person, për të cilin u tha se ishte një i afërm i drejtuesit të automjetit, dhe që ishte pasagjer në mjet.
