Alfred Prodani, 41-vjeçari i arrestuar sot nga Policia e Lezhës për llogari të Spanjës.
Prodani ishte drejtor i Ujësjellësit të Kurbinit, ndërsa ishte në kërkim ndërkombëtar që në vitin 2013 nga Spanja me akuzën për vjedhje. Ai vazhdonte detyrën në Kurbin, edhe pse ishte denoncuar që në vitin 2019 nga lideri historik demokrat, Sali Berisha.
Ky i fundit e bëri denoncimin në mars të vitit 2019. Në mesazhin e dërguar nga qytetari dixhital, thuhej se Prodani dhe një tjetër drejtor i PS-së në Laç, kanë vjedhur shtëpinë e futbollistit të njohur të Realit të Madridit, Karim Benzema.
“Përshëndetje z. Berisha, jam një qytetar nga Laçi. Ma pyet pak kryeministrin ku ndodhen dy drejtorët, njëri prej të cilëve i Ujësjellësit, apo janë në burg në Spanjë, ku akuzohen për vjedhjen e shtëpisë së futbollistit të Real Madridit, Benzema”, thuhej në mesazh.
Mediat pranë qeverisë reaguan duke publikuar një reagim nga Prodani, i cili thotë se kjo nuk është e vërtetë.
Por sot, pas 9 vitesh në kërkim ndërkombëtar, teksa drejtonte i qetë një institucion shtetëror, Prodani ka rënë në pranga.
