Përkeqësohet gjendja shëndetësore e 60-vjeçarit Dedë Pllanajt i plagosur me 30 prill në Dobraç të Shkodrës.
Pas ndërhyrjes në spitalin rajonal të Shkodrës, Pllanaj është transportuar mëngjesin e 1 majit në Spitalin e Traumës në Tiranë për mjekim të specializuar.
60-vjeçari është qëlluar 7 herë me armë zjarri pistoletë, ndërsa 6 plumba e kanë goditur në këmbë, në duar dhe brinjë. Kujtojmë se 60-vjeçari është djali xhaxhait i Bardhok Planajt, i cilësuar si ‘kumbari i Shkodrës’ që u ekzekutua para një viti me breshëri kallashnikovi.
‘Po qëndroja ulur tek puna në karburant, në një moment erdhi një motoçiketë, drejtuesi i saj ishte me kaskë të zezë. Zbriti dhe u afrua drejt meje dhe më qëlloi. Nuk ia pash dot fytyrën, nuk e di kush ishte. Unë personalisht nuk kam konflikte dhe nuk e di kush mund të jetë dhe as arsyen’, ka thënë ai.
Hetuesit mendojnë se atentatori nuk është dorë profesioniste, por gjithsesi e lidhin me ngjarjet e së kaluarës dhe dyshimeve për konfliktet që Planajt kanë pasur që më herët. Vetë 60-vjeçari Dedë Planaj nuk njihet për njeri problematik, por lidhja e gjakut me Bardhok Planajn mendohet të jetë shkak i këtij atentati.
