Seanca e parë për votimin e Presidentit të ri të Republikës pritet të zhvillohet më 16 Maj.
Këtë të Mërkurë, në Konferencën e Kryetarëve, Enkeljed Alibeaj ka kërkuar që procedurat në Kuvend për zgjedhjen e presidentit të mos nisin sot, siç kishte kërkuan PS, por në datë 10 Maj. Propozimi u mbështet nga kryetari i grupit parlamentar socialist, Taulant Balla.
Balla shpjegoi se në datë 10 Maj do të mblidhet sërish Konferenca e Kryetarëve dhe më pas raundi i parë i votimit në parlament mund të zhvillohet më 16 Maj.
“Po bëj një simulim: Në datë 10 Maj mblidhet sërish Konferenca e Kryetarëve. Në datë 15 deri në orën 16:00 në Kuvend të jetë depozituar emrat për kandidatë. Komisioni i ligjeve bën shqyrtimin në orën 10. Pas verifikimit shkojmë në seancë plenare pasdite për ti lënë kohë komisionit të ligjeve. Kjo është tradita parlamentare”, tha Balla.
Në komision, Fatmir Mediu kërkoi bisedime mes forcave politike, por Balla tha se PS do të zhvillojë bisedime vetëm me grupet e tjera parlamentare në Kuvend.
Afati i fundit kushtetues për nisjen e procedurave është data 24 Maj, u tha në mbledhje.
Deputetët e opozitës në komision kërkuan që Presidenti i ri të zgjidhet me konsensus mes palëve politike, megjithëse u shprehën skeptikë se kjo do të ndodhë.
Mazhoranca, në fakt, i ka votat për të zgjedhur e vetme Presidentin e ri pas raundit të tretë, kur mjaftojmë 71 vota deputetësh.
