Deputetja e Partisë Demokratike, Albana Vokshi thotë se Enkelejd Alibeaj nuk është i mandatuar nga organet drejtuese të partisë për të negociuar me mazhorancën për zgjedhjen e Presidentit të ri.
“Zot Enkelejd Alibeaj nuk është i mandatuar për të negociuar me mazhorancën për Presidentin. Nuk është Edi Rama ai që përcakton se kush është opozita dhe se kush janë negociatorët. Ne e dimë që Rama me Bashën kanë një pakt, që vijon prej muajsh apo prej vitesh, por Kuvendi i 30 prillit tregoi se tashmë ka një opozitë të vërtetë”, tha Vokshi.
Në një intervistë për A2 CNN, Vokshi tha se mes Bashës dhe Ramës ka një marrëveshje të fshehtë, por shton se ky i fundit nuk ka tagër për të përcaktuar se kush është opozita e vërtetë.
“Unë kam qenë pjesë e Konferencës së Kryetarëve edhe në mandatin e kaluar, edhe në këtë mandat. Në mandatin e kaluar ka pasur raste që janë transmetuar online, sot më thanë që ishte kërkuar nga Alibeaj për tu transmetuar online. Në fakt është kryetarja e Kuvendin, e cila përcakton se cila konferencë do të transmetohet.
Por kjo nuk përcakton vijën politike të PD dhe Enkelejd Alibeaj nuk është i mandatuari i PD për të bërë negociata për presidentin.
Nuk është Edi Rama ai që përcakton se kush është opozita e vërtetë, nuk është Edi Rama ai që përcakton se kush janë negociatorët në këtë rast. Ne e dimë që ka një pakt Lulzim Basha-Edi Rama, një pakt që vijon prej muajsh në mos prej vitesh.
Por Kuvendi i 30 prillit ka një lajm të mirë për të gjithë qytetarët. I është dhënë fund koha që opozita merrej me veten e saj, tashmë ka një opozitë të vërtetë pas 30 prillit”, tha Vokshi.
