Zgjedhja e nënkryetarëve dhe Sekretariatit, ja kur pritet të mblidhet Këshilli Kombëtar i PD

Këshilli i ri Kombëtar i Partisë Demokratike pritet të zhvillojë mbledhjen e parë të tij mes datës 10-12 maj, ndërsa përveç konstituimit në këtë mbledhje do të votohet edhe për nënkryetarët, Sekretarin e Përgjithshëm, sekretariatin dhe anëtarët e Kryesisë.

Mësohet se për çdo pozicion do të ketë më shumë se 1 kandidat, ndërsa votimi i anëtarëve të Këshillit do të jetë i fshehtë.

Ish-Kryeministri Sali Berisha u shpreh se do të jetë një proces transparent, ku çdo votë do të tregohet para kamerave, ndërsa gara mbetet e hapur për cilindo që do të vetëdeklarohet si një kandidat.

Ende nuk dihen se cilët emra mund të hyjnë në garën për pozicionet më të larta drejtuese në Partinë Demokratike, por ajo që dihet është se javën e ardhshme demokratët do të kenë të zgjidhur edhe dilemën se kush do të jetë kryetari i Grupit Parlamentar të PD.

Kuvendi i 30 prillit shkarkoi nga ky pozicion Enkelejd Alibeajn, ndërsa pasuesi i tij do të votohet nga Këshilli Kombëtar si nënkryetar i PD, dhe më pas automatikisht merr edhe drejtimin e grupit parlamentar. E njëjta procedurë ndiqet edhe për pozicionin e nënkryetarit tjetër, i cili mban funksionin e nënkryetarit të Parlamentit.

Mbledhja e Këshillit Kombëtar dhe zgjedhja e strukturave drejtuese, do të pasohet me 22 maj me zgjedhjen e kryetarit të PD-së, sipas parimit “një anëtar, një votë”. Deri më tani dihet fakti se në garën për kreun e PD do të garojë ish-Kryeministri Sali Berisha, ndërsa nuk dihet për emra të tjerë që mund ti bashkohen procesit.

“Nuk ka rivalë, ka marrë fund koha kur Edi Rama shpikte rivalë për veten e tij. Këto kërkojini atje. Me Sali Berishën nuk ka kështu. Nuk shpik, por respektoj rivalin”, tha Berisha.

Duke iu referuar 7 majit, afatit për dorëzimin e dokumentacionit për kandidatët për kreun e PD-së, Berisha tha se nuk i ka dorëzuar dokumentet, por do respektojë afatet.

“Nuk kam depozituar dokumentet. Sot u informova për vendimin e komisionit, unë do respektoj afatet e caktuara. Asgjë të re nuk them me këtë. Këtë e kam thënë shumë herë. Nuk ka asgjë të re në këtë”, theksoi ish-Kryeministri.