Ish-Kryeministri Sali Berisha deklaroi pasditen e sotme se çdo kush që ka dyshime për procesin e numërimit të votave për anëtarë të Këshillit Kombëtar, ka të drejtë të kërkojë rinumërimin e votave.
Berisha tha se nga ky proces ka pasur edhe zemërthyer apo të mërzitur, por secili prej tyre ka të drejtën të kërkojë rinumërim dhe verifikim të çdo vote.
“Risi madhore kjo jo vetëm për PD, por për çdo forcë tjetër politike në vend. Imagjinoni pak kur edhe në PD, kur më parë votonin delegatët, votat jo vetëm nuk numëroheshin siç duhej, por edhe manipuloheshin, dhe me keqardhje e pohoj se kjo që ka ndodhur ishte një turp”, tha Berisha.
Ai tha se i gjithë ky proces bashkoi demokratët, pasi mbi 40 mijë anëtarë aktivë të PD morën pjesë në proceset zgjedhore.
“40 mijë anëtarë janë një ushtri e pathyer dhe e pamposhtur”, tha Berisha, duke shtuar se me 30 prill, PD u bashkua më shumë se asnjëherë. Sipas tij, bashkimi i demokratëve ndodhi përmes votës së lirë.
Berisha u shpreh se edhe ata deputetë që munguan në Kuvendin e PD e kanë vendin në këtë parti. “Askush, asnjë deputet, nuk mund të mbajë peng një forcë opozitare”, tha ai.
