Është ekstraduar nga Gjermania në drejtim të vendit tonë Genc Tafili.
Ai u arrestua në muajin Janar në Gjermani pasi ishte shpallur në kërkim për vrasjen e kryepolicit të Shkodrës, Arben Zylyftari.
Genc Tafili është dënuar me 25 vite burg nga Gjykata e Lartë për vrasjen e komisarit të policisë Arben Zylyftari në vitin 2000. Në vitin 2018, me një vendim të gjyqtares së Krujës Enkelejda Hoxha, ai u lirua me kusht, rreth 6 vite para afatit të përfundimit të dënimit.
Vendimi i shkallës së parë u rrëzua nga Gjykata e Apelit Tiranë, që më 27 Maj 2021 vendosi rikthimin e tij në qeli.
Megjithatë, Genc Tafili u largua nga vendi dhe ai u arrestua në aeroportin e Frankfurtit teksa po tentonte të shkonte në Stamboll, më 31 dhjetor 2021.
Kush është Genc Tafili
Gjithçka ka nisur në 2 gusht të vitit 2000. Bahri Tafili, babai i Genc Tafilit ishte shpallur në kërkim pasi dyshohej se ishte autor i vrasjes së Gëzim Gecit, pas një konflikti për çështje pronësie.
Asokohe, shefi i Krimeve në Policinë e Shkodrës, Prelë Pjetrushi dhe disa efektivë të tjerë në po kryenin një kontroll rutinë, kur vunë re se Bahri Tafili u largua me vrap dhe u mbyll në banesë.
Menjëherë nisën tentativat për ta arrestuar, por Tafili dhe djali i tij Genci qëlluan me armë drejt forcave të policisë.
Në kushte të tilla, shefi i policisë Pjetrushi kërkoi përforcime dhe në krye të Forcave të Ndërhyrjes së Shpejtë vihet Drejtorti i Policisë së Shkodrës, Arben Zylyftari.
Pas disa minutash breshëri plumbash mori një plumb në gjoks dhe ndërroi jetë pak orë më pas në Spitalin e Shkodrës, komisari Arben Zylyftari.
Ndërkohë i vdekur mbeti edhe Bahri Tafili, i ati i Genc Tafilit. Pas ngjarjes autoritetet arrestuan Gencin, i cili u dënua me 25 vjet burgim, por pas 17 vitesh në qeli Gjyqtarja e Krujës, Enkelejda Hoxha e liroi me kusht.
Çfarë ndodhi më pas? Teksa Genci ndodhej në qeli, djali tjetër i Bahri Tafilit, Admiri nisi të vërë në zbatim planin për “Ekzekutimin e Prelë Pjetrushit”, pasi dyshonte se ai ishte shkaktari i vrasjes së babait.
Pjetrushit iu bë atentat teksa ndodhej me shërbim në komisariatin e Malësisë së Madhe dhe mbetet i plagosur rëndë.
Si autor i ngjarjes u dyshuar Admir Tafili dhe disa muaj më vonë arrestohet nga policia, ndërsa oficeri i lartë i policisë Prelë Pjetrushi u largua nga Shqipëria për arsye sigurie.
