Mesditën e 4 majit, Kuvendi i Shqipërisë, nis procedurën për zgjedhjen e Presidentit të ri.
Do të jetë Konferenca e Kryetarëve, e cila do të mblidhet rreth orës 12:30 për të përcaktuar datën e raundit të parë të votimit për zgjedhjen e Presidentit.
Socialistët kanë propozuar datën 10 maj, ndërsa sipas Kushtetutës nga raundi në raund duhet një afat 7 ditor.
Në 3 raundet e para, zgjedhja e Presidentit kërkon shumicën e cilësuar prej 84 votash, ndërsa në raundin e 4 dhe të 5-të, mjaftojnë 71 vota.
Partia Socialiste dhe aleatja e saj, PSD, kanë në Kuvend 77 mandate deputetësh, çka do të thotë se për të siguruar zgjedhjen e Presidentit në 3 raundet e para duhen 7 vota nga rradhët e opozitës.
Socialistët kanë përcaktuar edhe treshen e negociatorëve, Taulant Balla, Damian Gjiknuri dhe Elisa Spiropali, për të diskutuar me Grupet Parlamentare të opozitës, ndërsa Komisioni i Rithemelimit që drejton PD-në, ka deklaruar se nuk do të përfshihet në një proces që e konsideron fasadë dhe show, përsa kohë Edi Rama ka votat e mjaftueshme për zgjedhjen e Presidentit.
Por duket se socialistët do të shfrytëzojnë situatën që po kalon PD, ku duket se negociatat do të zhvillohen me Enkelejd Alibeajn, të cilin mazhoranca e Edi Ramës e njeh për Kreun e Grupit Parlamentar demokrat, edhe pse në Kuvendin Kombëtar të 30 prillit, ai u shkarkua nga ky funksion.
Gjithashtu të gatshëm për negociata me PS janë shprehur edhe disa nga deputetët e partive aleate të PD, që hynë si pjesë e listës shumëemërore të demokratëve, por që më pas kanë krijuar grupe të tjera parlamentare.
