Nga Boldnews.al
Spidermani i Tiranës këtë herë nuk qëlloi në shenjë, aty ku ndodh një aksident, aty ku i vendoset kapaku një pusete, aty ku shtatë filmojnë dhe një punon, patjetër që duhet të jetë kryebashkiaku Erion Veliaj. Aksidenti ngjau. Autobusi elektrik i linjës së urbanit të Unazës, që u pagëzua nga Rama dhe Veliaj u çorientua totalisht duke shkaktuar një aksident të frikshëm, që për fat u mbyll me gjashtë të lënduar, pa rrezik për jetën.
Po si ndodhi pa qenë i pranishëm ai… dhe të shfaqej si heroi i natës, aty në bregun e Lulmit Lanë ku “jashtëqitet” jo vetëm pjesa më e madhe e Tiranës, por edhe propaganda e pushtetit. Megjithatë “herojtë” nuk do të mungonin. Më e shkathët doli ministrja e Shëndetësisë Ogerta Manastirliu, që thuhet se po kalonte rastësisht pranë zonës ku u aksidentua autobusi urban i linjës së Unazës së Tiranës me një automjet. Autobusi përfundoi në Lanë, por çuditërisht koka dhe fundi i mjetit të transportit urban prekën dy brigjet e lumit të pisët, a athua se ishte vendosur me dorë.
Të ndihmon fati ndonjëherë që një aksident që për pak nuk shkaktoi tragjedi të kthehet në propagandë për pushtetin, qëndror e lokal. Ministrja u pa në vendin e ngjarjes e më pas vrik e në Spitalin Ushtarak. Kryebashkiaku i Tiranës mbërriti më vonë, por shfaqjen nuk e humbi, donte edhe ai vëmendjen. Autobusi me urdhrin e tij do të qëndrojë aty në Lanë, si një “atraksion histerik” dhe propagandistik.
Pa dalë ende nga spitali gjashtë të lënduarit, vendimi nga kryebashkiaku i Tiranës ishte marrë për ta lënë autobusin aty në vend, pa e lëvizuar për gjoja “sensibilizim qytetar” për aksidentet rrugore. Mendje brilante… Por si ta nisësh ashtu edhe do të përfundosh, pasi në ditën e dytë të qëndrimit në Lanë, prurjet e ujrave të zeza ishin të vrullshme, duke e larë keqas “autobusin propagandistik”.
Në fakt është më shumë se propagandë. Qëllimi shkon edhe përtej saj, ku përgjegjësinë duan ta kthejnë në “risi”. Drejtuesi i autobusi hibrit, “linjë e gjelbër”, këmbëngul që mjeti që drejtonte pësoi çoriditje duke marrë shpejtësi të papritur. Po ashtu edhe ekspertët e policisë pak minuta pasi kryen verifikimet e para ishin me dyshimin se mund të kishte pasur një defekt elektronik në autobusin urban. Për efet të hetimeve, mjeti duhet të ishte spostuar në Policinë e Qarkullimit Rrugor të Tiranës ku duhet të kryhet edhe ekspertiza e nevojshme. Kjo nuk ka ndodhur, edhe në kundërshtim me çdo praktikë dhe ligj që ndiqet për aksidentet rrugore, kudo që ata ndodhin.
Duke e veshur të gjithë ngjarjen me hije të mëdha dyshimi, kryebashkiaku urdhëroi që të lihej aty ku ishte, për “sensibilizim”, por edhe kjo mund t’i prishet në duar “spidermanit” të kryeqytetit. Mjaftuan pak minuta shi dhe breshër që Lana të fryhej aq shumë sa të përplaste ujin e pisët në trupin e autobisit. Gjithashtu kjo nismë është një çmenduri më vete, pasi në rast të prurjeve më të mëdha rrezikohet të përbytet Tirana nga ish-Ekspozita “Shqipëria Sot” deri në zonën e Asirit. Çdo pengesë në Lanë kur ka prurje të shtuara është shkak që lumi i jashtëqitjeve të dalë nga shtrati.
Nëse kjo ndodh, çizmet e gjata Lali Eri i ka gati, duke bërë shpëtimtarin dhe fryrë propagandën se në ditë të vështira, ku natyra gjithnjë për ta thuhet “një herë në 100 vite” bën çmendurira të tilla. Autobusi “Grren Line”, u kthye në “Green Lanë+fekale propagandistike?!
