Enkelejd Alibeaj nuk do të jetë më kryetar i grupit parlamentar të PD-së. Kjo u bë e ditur në Kuvendin e Partisë Demokratike që po zhvillohet në Pallatin e Kongreseve.
Kuvendi Kombëtar i PD ka shpallur vakancën për kreun e Grupit Parlamentar të PD. Ka qenë kreu i komisionit që po drejton puniet e Kuvendit, Belind Këlliçi, ai që deklaroi se kreu i Grupit Parlamentar do të zgjidhet nga Këshilli Kombëtar – organ ky që zgjidhet ditën e sotme.
“Në mbështetje të neneve 49 dhe 51 të Statutit të Partisë Demokratike të Shqipërisë, miratuar në datën 11.12.2021, nenit 5 pika 1 të Rregullores nr.1 dt. 12.02.2018 ‘Për organizimin dhe funksionimin e grupit parlamentar të Partisë Demokratike dhe veprimtarinë e deputetëve të tij’, si dhe Vendimit nr. 03 dt 11.12.2021 të Kuvendit Kombëtar të Partisë Demokratike, me propozimin e Komisionit të Rithemelimit si dhe të një grupi deputetësh të PDSH, Kuvendi Kombëtar i Partisë Demokratike vendosi: 1.Konstatimin e vakancës së pozicionit të kryetarit të grupit parlamentar të Partisë Demokratike, për shkak të mungesës së nënkryetarëve të zgjedhur të Partisë; 2.Ngarkohet Këshilli Kombëtar i partisë për zgjedhjen dhe caktimin, së bashku me nënkryetarët, edhe të kryetarit të grupit parlamentar të PDSH. Ky vendim hyn në fuqi menjëherë”, njoftoi Këlliçi.
