Fatbardh Kadilli iu drejtua me një apel ish-Kryeministrit Sali Berisha që ti hapte rrugën brezit të ri në Partinë Demokratike.
Kadilli tha se një garë ku Berisha të kandidonte për kryetar jo se nuk ishte demokratike, por nuk do të ishte një garë reale, bazuar te mbështetja në anëtarësinë e partisë.
“Atë të cilin e dënojmë sot, Lulzim Bashën e duartrokismin 9 muaj më parë. Jemi marrë me blindimin e PD dhe izolimin e partisë, por tregohemi të verbër për blindimin dhe izolimin që ka partia nga qytetarët që kërkojnë ndryshim. Jemi tallur me Bashën në 6 mars, dhe krenohemi me Berishën.
Ky është rreziku që kemi para, të kthehemi në një parti 30 përqindëshi, që tërheq vetëm anëtarësinë. Rrezikohemi të kthehemi në një parti të huaj për gratë e të rinjtë. Nuk po shkëputemi dot nga e shkuara.
Berisha kërkon të bëhet kryetar i parisë dhe mbetet për 30 vjet oferta e vetme e partisë. Elita e re drejtuese do jetë ajo që ka qenë. Do jetë dështimi ynë në zgjedhjet lokale dhe ato të përgjithshme. PD është e 2013, për të koha ka mbetur në vend. Hap rrugën për një brez tjetër në krye të PD”, tha Kadilli.
