30 punonjës të incineratorit ditën e sotme kanë dalë në protestë pasi që prej 4 muajsh nuk kanë marrë pagat.
Për mikrofonin e Ora News, punëtorët thanë se kjo që po bëhet është krim, ndërsa kanë shtuar se kanë ndërprerë që prej dy javësh punën në incinerator.
Njëri prej punonjësve shprehet se i gënjejnë duke i thënë se do ua japin pagat, ndërsa shtoi se nuk ka shpresë se do i marrë lekët.
“Për një faturë energjie këta të shembin shtëpinë, këto kanë 4 muaj që nuk na paguajnë. Ky është gjenocid. Me çfarë të hamë e të pimë. Na kanë lënë 4 muaj pa bukë. Të na japin lekët e të ikim”, tha një prej tyre.
“Kemi 4 muaj që s’i kemi marrë rrogat. Erdhën na thanë që jo këtë javë po javën tjetër. Prit e s’ka Edhe ne e kemi ndërprerë punën që dy javë. Unë nuk rri më kam rreth 600 mijë lekë borxh. Ato 1 milionë e gjysmë që kanë ngelur t’i marrin. S’jam i sigurt nëse do i marrim. Nuk dimë se kush na paguan. Nuk e njohim pronarin. S’kam shpresë se do i marr”, u shpreh një tjetër.
Ata thanë se personat që e kanë marrë në administrim insineratorin e Fierit, u kanë premtuar se do u japin rrogat, por që deri më tani nuk kanë marrë asnjë lekë.
“Nuk po shkoj dot në shtëpi, s’kam çfarë t’u them fëmijëve, duan të hanë bukë, tre vakte. Ne kemi ngelur në harresë”, tha një punëtor.
“Jam i vetmi në shpi që po punoj. Jam baba i tre fëmijëve. Ata që e kanë marrë në administrim na premtoi se do të na jepte pagat”, deklaroi një tjetër.
