Një 37-vjeçar i shpallur në kërkim për kultivim të bimëve narkotike është arrestuar nga policia në Malësinë e Madhe.
Uniformat blu pas marrjes së informacionit në rrugë operative për vendndodhjen e një shtetasi të shpallur në kërkim kombëtar, organizuan dhe finalizuan operacionin policor të koduar “Vajushi”.
Si rezultat i këtij operacioni u bë kapja dhe ndalimi i shtetasit D. J., 37 vjeç, banues në fshatin Dukë, Malësi e Madhe.
Sipas bluve, Gjykata e Rrethit Gjyqësor Shkodër, me vendimin e datës 29.04.2022, i ka caktuar 37-vjeçarit masën e sigurisë “Arrest në burg”, për veprat penale “Kultivimi i bimëve narkotike” dhe “Largimi i të burgosurit nga vendi i qëndrimit“.
Në tetor të vitit 2021, në oborrin e banesës së tij në fshatin Dukë, Malësi e Madhe, 37-vjeçarit i janë gjetur të kultivuara bimë narkotike Cannabis Sativa.
