Një 61-vjeçar është arrestuar nga policia e Fierit, pasi akuzohet se shfrytëzonte për prostitucion një 35-vjeçare.
Burime zyrtare nga blutë informuan këtë të Premte se ndërhynë në banesën e 61-vjeçarit dhe aty gjetën 35-vjeçaren bashkë me një ‘klient’. Policia njoftoi se të dy u kapën në kushtet e “flagrancës”.
“Në bazë të provave të grumbulluara, pas disa ditësh vëzhgim, u finalizua operacioni policor i koduar ‘Çarli’, në kuadër të të cilit u arrestua në flagrancë, për veprat penale ‘Shfrytëzimi i prostitucionit’ dhe ‘Përshtatja e ambienteve për prostitucion’ Agron Myrdini, 61 vjeç, banues në Fier, i dënuar më parë për veprën penale ‘Përkrahja e autorit të krimit’”, njoftoi policia.
Gjithashtu, shtuan të njëjtat burime, “u proceduan penalisht për veprën penale ‘Ushtrimi i prostitucionit’, një shtetase 35 vjeçe dhe shtetasi F.Xh., të cilët u kapën në flagrancë në ambientet e banesës së shtetasit Agron Myrdini”.
