Nga Boldnews.al
Kryeministri Edi Rama takoi Ndihmës Sekretaren Amerikane të Shtetit për Evropën dhe Euro-Azinë, Karen Donfried, dhe në fund të dy dolën të buzëqeshur. Një pirg me bojna në tavolinën kryeministrore dhe një çantë e thurur me dorë nga gratë e veriut ishin dekori i dukshëm pas një bisede “mbresëlënëse”.
-“Diskutuam gjerësisht për ecurinë pozitive të reformave, forcimin e drejtësisë, investimet strategjike në energji, veton e Bullgarisë ndaj Maqedonisë së Veriut, situatën në rajon, si edhe për mbështetjen e plotë që Shtetet e Bashkuara i japin Ballkanit të Hapur. Konsideratat e Ndihmës/Sekretares për rolin e Shqipërisë në Këshillin e Sigurimit dhe në rajonin tonë ishin mbresëlënëse”. Kështu shkroi kreu i qeverisë që njëkohësisht u kujdes që të publikonte dy foto që tregonin momentin kur Rama i jep si dhuratë një çantë të punuar me dorë.
Pas kësaj vizite nuk dihet se kë të besojmë për “arritjet e qeverisë”, zyrtaren e lartë që mbart dy standarde në raportet e saj, apo Ramën që ka vetëm një standard, atë të propagandës. Donfried vjen nga radhët e Departamentit Amerikan të Shtetit dhe më së paku, para se të nisej për vizitë i ka hedhur një sy raportit të DASH mbi Shqipërinë.
“Korrupsioni i përhapur në të gjitha nivelet qeverisëse”; “Shkelje te të drejtave të njeriut”; “Probleme serioze me zgjedhjet, fenomeni i shitblerjes mjaft shqetësues”; “Krimi i organizuar dhe trafiqet e paligjshme mjaft shqetësuese”. Këto janë disa nga gjetjet e raportit të Departamentit Amerikan të Shtetit për Shqipërinë gjatë vitit 2021.
Në atë që shkruhet dhe atë që thuhet ka një hendek të madh nga zyrtarët amerikanë që ende po kryejnë eksperimente më një vend “kavje” si Shqipëria. Autoritarizmi jo vetëm politik, nuk është më rrezik i mundshëm për të ndodhur, por fakt i përditshëm. Megjithatë qeveria vijon të mbështetet, opozita të rrënohet dhe pavarësisht se raportin më të besuar kanë atë të DASH, askush nuk e artikulon.
Pritej që ambasadorja të reagonte pas publikimit të tij. E kur mendohej që do të vinte një qëndrim zyrtar i detajuar, ambasadorja Kim gjeti ditën për të bërë një paradë në “Tiranën që ndryshon” dhe personazhet qeveritarë mburren me disa foto e video përkrah kryediplomates amerikane në Shqipëri.
Taktika tashmë është e njohur kur e vetmja arritje e qeverisë është propaganda me strehimin e afganëve, me politikën që po ndjek në Këshillin e Sigurimit të OKB-së e cila shërben si furçe për të mbuluar regjimin që nis me shitblerjen e votave dhe përfundon me aferat e frikshme korruptive, duke gjunjëzuar gjithë shoqërinë.
A i nxë torba e dhuruar dosjet e korrupsionit dhe kontrollit të çdo pushteti? Do duhen avionë të mëdhenj transportues “Super Guppy” për të mbartur aferat qeveritare, por mjafton një torbë e vogël si dhuratë domethënëse për të treguar se furçat e Ramës sot për sot po bëjnë punë, për të zënë sytë edhe të një lobi të vogël që ka nën vëzhgim një copëz vend si Shqipëria.
Aq sa zonja që mbërriti nga SHBA pranoi bojatisjen nga Rama dhe u mallëngjye me dhuratat aspak të shtrenjta, por mjaft domethënëse. Ajo torbë e thurur me ngjyra të ndezura, ku zë vend ajo e lejlasë së Rilindjes.
