Kryetari i Bashkisë së Tiranës, Erion Veliaj, ka folur pas aksidentit të ndodhur mbrëmjen e sotme ku një autobus ra në lumin Lana duke marrë përpara edhe një automjet tjetër.
Veliaj deklaroi se asnjëri prej shoferëve nuk kishte konsumuar alkool ndërsa theksoi se asnjë prej të plagosurve nuk është në rrezik për jetën.
“Të dy drejtuesit e automjeteve nuk kanë konsumuar alkool. Nuk kemi asnjë njeri në rrezik për jetën. Asnjë person të lënduar rëndë. Na duhet të lejojmë policinë që të bëjë të gjitha matjet.
Të lëmë profesionistët të merren me këtë punë si dhe me zhvendosjen e mjetit. Jeta është jashtë rrezikut të tjerat janë hekurishte që do gjejmë një mënyrë që t’i lëvizim. Tani si kryetar i bashkisë dhe miku juaj dua t’iu kërkoj ndihmë. Na duhet rrugët e lira sidomos për vinçat që do duan më shumë korsi”, deklaroi Veliaj.
Ndërsa drejtuesi i policisë rrugore Taulant Gjoka foli për dinamikën e aksidentit. “Si e shikoni është një aksident rrugor që në pamje të parë duket i rrezikshëm. Kemi 5 persona të dëmtuar lehtë. Më e rëndësishme është reagimi i parë që ka qenë në kohë reale”, u shpreh ai.
Tiranë/Informacion shtesë
Në vijim të informacionit paraprak të dhënë pak më parë, se në afërsi të Kinema Agimi, një autobus është përplasur me një mjet dhe si pasojë ka rënë në Lumin Lana, bëjmë me dije se janë paraqitur për kontroll mjekësor dhe ndodhen jashtë rrezikut për jetën, shtetasit M. K., 62 vjeç, (drejtuesi i autobusit), A. K., 61 vjeç, (faturino), pasagjerja e autobusit, shtetasja F. Ç., 64 vjeçe, shtetasi J. R., 27 vjeç (drejtuesi i mjetit) dhe shtetasi A. H., 27 vjeç, (pasagjeri i mjetit).
