23-vjeçari Fazli Hoxha mbeti i vdekur nga të shtënat me armë mbrëmjen e djeshme në Klinë të Kosovës.
Ai sapo kishte dalë bashkë me familjen nga lokali ku kishin konsumuar darkën, kur disa persona nisën të qëllonin me armë drejt tyre.
Katër persona janë vënë në pranga dhe një tjetër është shoqëruar, njofton Policia e Pejës.
Mësohet se mes familjes së Hoxhës dhe autorëve ka pasur përleshje fizike, ku janë përdorur dhe shkopinj druri.
Dy persona të tjerë që mbetën të plagosur, ndodhen në spitalin e Pejës, në përkujdes mjekësor, ndërkohë që rrethanat e ngjarjes mbeten ende të paqarta.
“Policia është njoftuar se ka të shtëna me armë zjarri dhe dyshohet për të plagosur. Me të arritur në vend të ngjarjes, është konstatuar se dy persona janë të lënduar. Janë dërguar në qendrën mjekësore në Klinë, pastaj janë dërguar me emergjencë në Pejës. Pas pak kohe, mjeku kujdestar ka konfirmuar vdekjen e njërës viktimë”, deklaroi zëdhënësi i Policisë për rajonin e Pejës, Fadil Gashi.
