Vonesa prej 36 minutash e ambulancës bëri që një 33-vjeçar të humbte jetën në Greqi. Për këtë gjykata vendosi të dëmshpërblejë me 200 mijë euro familjen e viktimës.
Sipas medias greke “Prothema”, 33-vjeçari kishte pësuar atak kardiak dhe humbi jetën për shkak se ambulanca vonoi 36 minuta për të shkuar në vendngjarje.
Gjykata greke vendosi të shpërblejë familjen e 33-vjeçarit me 200 mijë euro. 33-vjeçari ishte i martuar dhe baba i dy fëmijëve 4 vjeç e 8 muajsh dhe të ardhurat e tij mujore rreth 878 euro ishin të vetmet me të cilat mbante familjen.
Pas vdekjes së tij, gruaja kërkoi nga gjykatat administrative dëmshpërblimin për dëmin moral që pësoi nga vdekja e papritur e bashkëshortit dhe babait të fëmijëve të tyre.
Ajo ka kërkuar që asaj dhe fëmijëve deri në moshën madhore t’u jepen para për ushqime dhe për nevojat e jetesës.
Kështu qeveria greke, duke ratifikuar vendimin e apelit, ka dhënë 200 mijë euro si dëmshpërblim financiar për vuajtjen mendore që gruaja pësoi nga vdekja e bashkëshortit për shkak të vonesës dhe asistencë mujore deri në 1200 euro për dy fëmijët deri në moshën 18 vjeç.
