Elfat Saliu është arrestuar si autori i dyshuar i plagosjes me armë zjarri të 28-vjeçarit Edis Reçaj, ngjarje e ndodhur më 19 Prill.
Saliu akuzohet për veprat penale “Vrasja” e mbetur në tentativë dhe “Mbajtja pa leje e armëve luftarake dhe e municionit”.
“Shërbimet e Komisariatit të Policisë Shkodër, në bashkëpunim me Forcën e Posaçme ‘Shqiponja’ të DVP Shkodër, në bazë të informacioneve të marra në rrugë operative, për vendndodhjen e një personi të shpallur në kërkim për plagosje me armë zjarri, organizuan dhe finalizuan operacionin policor të koduar ‘Perash’. Si rezultat i këtij operacioni u bë i mundur lokalizimi i personit të kërkuar, i cili fshihej në një hotel në lagjen ‘Mark Lula’. Shërbimet e Policisë kanë bërë kapjen dhe ndalimin e autorit të dyshuar të ngjarjes, shtetasit Elfat Saliu, 29 vjeç, banues në lagjen ‘Daniel Matlija’, Shkodër”, njoftoi policia.
I riu dyshohet se më datë 19 Prill, në lagjen Perash, ka plagosur me armë zjarri për motive të dobëta Edis Reçajn, banues në lagjen “Partizani”.
Po ashtu, u procedua penalisht në gjendje të lirë për veprat penale “Fshehja e të ardhurave” dhe “Moslëshimi i kuponit tatimor” Gj.D., 59 vjeç, banues në Shkodër, pronari i hotelit në të cilin fshihej Saliu. D.Gj. akuzohet se nuk ka kryer procedurat e nevojshme për regjistrimin dhe lëshimin e kuponit tatimor për shërbimin e ofruar në subjektin (hotelin) që administronte.
