Komisioneri i Bashkimit Europian për Zgjerimin dhe Fqinjësinë, Oliver Varhelyi pohoi këtë të Enjte nga Tirana se vetoja bullgare vijon të pengojë integrimin e Shqipërisë dhe Maqedonisë së Veriut në BE.
Ai tha se do të vijojë negociatat me Shkupin dhe Sofien në mënyrë që Bullgaria të japë dritën jeshile për çeljen e negociatave të dy vendeve në BE, që po trajtohet si një çështje.
“S’mund ti jap aspak kohë atyre që janë të përfshirë në këtë proces që ata të mos bëjnë atë që duhet të bëjnë. Do po punoj me miqtë bullgar dhe maqedonas, kërkoj për pak më shumë durim nga Shqipëria. Ne kërkojmë që kjo të mbyllet brenda presidencës franceze. Do të shkoj në Shkup dhe Sofje çdo ditë nëse është e nevojshme, duhet ta mbyllim këtë punë”, tha Varhelyi në një konferencë për mediat pas një takimi me kreun e qeverisë Edi Rama në kryeministri.
Varhelyi u shpreh se “vendimin nuk e kemi ne në dorë, e kanë shtetet anëtare, ndaj unë po bëjë këtë turn që ne të ecim përpara për një shtet që duhet të marrë vendimin”.
Nga ana tjetër, Rama tha se pas Qershorit, nëse nuk merret vendimi për çeljen e negociatave, do të kërkohet që shqyrtimi i çeljes së negociatave për Shqipërinë të ndahet nga Republika e Maqedonisë së Veriut.
“E ndava dhe me komisionerin që ne jemi në një kurs që e ka përcaktuar pozicionin tonë si pozicion konstruktiv dhe si një pozicion të lidhur me pozicionin e Maqedonisë së Veriut dhe në konformitet me pozicionin e Këshillit dhe Komisionit për mosndarje. Por po ashtu e informova dhe lidhur me faktin që ne kemi kryer një proces të Këshillimit Kombëtar dje, janë pyetur qytetarët nëse do ishin dakord që nëse gjendja mbetet e pandryshuar, Shqipëria të ndryshojë kursin dhe të kërkojë haptazi ndarjen nga Maqedonia e Veriut. Kjo mbetet për tu aktivizuar si qasje mbas kësaj mbledhje të Këshillit Evropian dhe deri në këtë takim ne jemi në pozicionin që të dyja vendet duhet të hapin negociatat”, tha Rama.
Në Qershor, vendet e unionit marrin një vendim për uljen ose jo në tryezën e parë ndërqeveritare të Shqipërisë dhe Maqedonisë së Veriut me Bashkimin Evropian.
