Shpërthime të shumta janë dëgjuar në qytetin rus të Belgorodit, rreth 40 km në veri të kufirit me Ukrainën. Lajmi është konfirmuar nga guvernatori rajonal Vyacheslav Gladkov. Në kanalin e tij Telegramai shkruan se u zgjua rreth orës 03:35 të së mërkurës nga zhurma e një shpërthimi.
Dhe ndërsa shkruante postimin e tij në rrjetet sociale, ai thotë se dëgjoi tre shpërthime të tjera të forta.
Gladkov më vonë tha se raportet paraprake treguan se një depo municioni ishte në zjarr në një vendbanim rural, por nuk kishte të raportuar asnjë viktimë civile.
“Sapo kontaktova me kreun e vendbanimit rural Golovinsky, Denis Zolotukhin. Sipas informacioneve paraprake, një depo municioni është në flakë pranë fshatit Staraya Nelidovka,” shkroi ai.
Ndërkohë rajoni i Belgorodit ka zgjatur statusin e tij të lartë të sigurisë së “rrezikut terrorist” deri më 10 maj, sipas një njoftimi të publikuar në një faqe interneti të qeverisë lokale.
Statusi i verdhë i sigurisë, i cili ka qenë në fuqi që nga 10 prilli, është niveli i dytë më i lartë i alarmit, pasi nënkupton që autoritetet kanë informacione që tregojnë mundësinë reale të një akti terrorist, sipas qeverisë ruse.
