Tre të rinj akuzohen se janë përfshirë në një sherr me efektivë policie në Tiranë. Burime zyrtare bënë me dije këtë të Martë se një prej tyre u arrestua, ndërsa dy të tjerë mundën tu shpëtonin prangave dhe janë shpallur në kërkim policor.
Akuzat
“Specialistët për Hetimin e Krimeve në Komisariatin e Policisë Nr. 2 bënë arrestimin në flagrancë të shtetasit E.L., 34 vjeç, banues në Tiranë, për veprat penale ‘Goditja për shkak të detyrës’, ‘Plagosja e lehtë me dashje’ dhe ‘Prishja e qetësisë publike’.
Gjithashtu, shpallën në kërkim për veprat penale ‘Plagosja e rëndë me dashje’, ‘Goditja për shkak të detyrës’, ‘Kundërshtimi i punonjësit të Policisë së rendit publik’, ‘Mosbindja ndaj urdhrit të punonjësit të Policisë së rendit publik’ dhe ‘Prishja e qetësisë publike’, të kryera në bashkëpunim, shtetasit M.D., 20 vjeç dhe J.D., 22 vjeç, të dy banues në Tiranë”, njoftoi policia.
Ngjarja
Sipas bluve, këta 3 persona, gjatë një konflikti për motive të dobëta, në rrugën “Ismail Qemali” kanë goditur me sende të forta R.S., 38 vjeç, dhe më pas nuk i janë bindur urdhrave të punonjësve të Policisë, për të ndaluar, por i kanë kundërshtuar ata, duke i goditur për shkak të detyrës.
E.L. është vënë në pranga, ndërsa M. D. dhe J.D. janë larguar.
