Kreu i grupit parlamentar socialist, Taulant Balla theksoi sërish këtë të Martë se me ish-kryeministrin Sali Berisha nuk do të ketë asnjëherë negociata për ndonjë çështje.
Balla mbajti një prononcim për gazetarët lidhur me zgjedhjen e Presidentit të ri. Edhe njëherë, ai tha se do zhvillohen negociata me kryetarët e grupeve parlamentare të opozitës dhe shtoi se nuk njeh ndonjë grup parlamentar të quajtur Komisioni i Rithemelimit.
“Me Berishën s’ka dhe s’do ketë negociata për asgjë. Për ne Berisha s’ekziston dhe me dikë që s’ekziston s’ka negociata. Në Kuvend rezultojnë të depozituara tre grupe nga opozita me drejtues zotin Alibeaj, zotin Mediu dhe zonjën Doda”, tha Balla.
Balla, në dalje nga mbledhja e grupit parlamentar të PS, shpjegoi hapat që ka nder mend të propozojë për zgjedhjen e presidentit. “Kemi pasur kontakte me një pjesë të grupeve parlamentare të opozitës, ku kemi dakordësuar kërkesën e zotit Mediu dhe zonjës Doda për të patur pak më shumë kohë në dispozicion, dhe kam informuar grupin tonë parlamentar. Do ta quaja një spostim me disa ditë për konferencën e parë të kryetarëve, ku sipas propozimit që do t’i dërgoj kreut të Kuvendit, të mbahet më 4 maj, dhe më pas të vazhdojmë me kalendarin që pas 7 ditës nga konferenca, me 10 maj, të jetë raundi i parë i zgjedhjeve të presidentit”, tha ai.
Balla shtoi se “shtyrja i shërben të gjithë grupeve parlamentare për të qartësuar procesin e negociatave. Kushtetuta përcakton nevojën e negociatave mes palëve në tre raundet e para, mirë do të ishte që grupet parlamentare të merrnin kohen e nevojshme. Ne hyjmë me dëshirën që t’i japim Shqipërisë një president të shqiptarëve dhe jo të Partisë Socialiste”.
Balla tha se ne fazat e para të negociatave “nuk do të prezantohemi me një listë, por me një profil, do vijë momenti për emrat kur të dakordësojmë profilin” .
